പനിയെന്നാൽ

 

പനിയെന്നാൽ

ഇല്ലാത്ത ഗോത്രത്തിലെ സങ്കൽപ്പ കിരീടം ചുമക്കുന്ന രാജശിരസ്സ് 

മൂർദ്ധാവിൽ തന്നെയാണ് ഭാരം 

അകമേ ബന്ദാചരിക്കുന്ന ചിന്താ സരണികളിൽ ശൂന്യത

 

ചിറകൊടിഞ്ഞ കാറ്റ് പോലെ ഉന്മാദം ഏതോ മുക്കിലിരുന്നു പിടയുന്നു

പൊടിപടലത്തിൽ ഏതേതോ രൂപങ്ങൾ മുജ്ജന്മ സഹകർമ്മികളെപ്പോലെ 

വരണ്ട നാക്ക്, നനഞ്ഞ മൂക്ക്

എന്തൊരു വിരോധാഭാസം 

കാമനകളെല്ലാം തലകീഴ് മറയുന്ന രംഗപാഠം 

ഒരുക്കുന്ന *വിത്തകന്റെ നർമ്മ സാരം 

വെയിൽ ചായും വരണ്ട മണപ്പുറം പോലെ 

മേലോട്ട് നോക്കി മലർന്ന് കിടക്കുന്നു 

ഒരു ശിശിരം അടിച്ചിട്ട വേനലിൻ്റെ സന്തതി 

*വിത്തകൻ - ശിവഭൂതങ്ങളിൽ ഒന്നായ ഭൈരവൻ. ജ്ഞാനി എന്നും വിവക്ഷ.