വകുപ്പുണ്ടോ സഖാവേ ഒരു മന്ത്രിയെടുക്കാൻ?

(note: this was an occasional piece which was meant to be posted and shared on facebook. since this does not go in tune with the nature of this blog, i have not shared it. this finds its place here just for the purpose of storage.) 

എന്ത് കണ്ടിട്ടാണ് ആളുകൾ ഈ ബഹളമൊക്കെ ഉണ്ടാക്കുന്നത് എന്ന് മനസ്സിലാവുന്നില്ല.

ഈ ബഹളക്കാർക്കൊക്കെ പാർട്ടിയെ കുറിച്ച് ഒരു ചുക്കും അറിയില്ല എന്നതാണ് കാര്യം. ഈ സത്യം എത്ര തവണ ഞങ്ങൾ പറഞ്ഞാലും തിരിയുന്നില്ലലോ?

ഞങ്ങൾക്ക് വലുത് പാർട്ടിയാണ്. പാർട്ടിയെന്ന മഹാപുരുഷനിലെ സൂക്ഷ്മ കോശങ്ങൾ മാത്രമാണ് ഞങ്ങൾ. മഹാ പുരുഷൻ എന്നാണ് പറഞ്ഞതെന്ന് പ്രത്യേകം ശ്രദ്ധിക്കുമല്ലോ? ഇതിന്ന് പുറത്തൊരു ലോകം ഞങ്ങൾക്കില്ല. ഇതിൽ തെളിയാത്തതൊന്നും ഞങ്ങൾക്ക് സത്യമല്ല. സത്യമല്ലാത്തത് കേൾക്കേണ്ട കാര്യവുമില്ലലോ? ഞങ്ങളുടെ ഭരണഘടനയും കോടതിയും, ശിക്ഷകനും രക്ഷകനും, പാർട്ടിതന്നെയാണ്.

ഇക്കഴിഞ്ഞ ദുരിതങ്ങളിലൂടെ നിങ്ങളെ നയിച്ചത് പാർട്ടിയാണ്. പാർട്ടി പറയുന്നതാണ് വകുപ്പ് മേധാവികൾ നടപ്പാക്കുന്നത്. വകുപ്പ് മേധാവി എങ്ങിനെയാണ് പാർട്ടിയേക്കാൾ വലുതാവുന്നത്? വലുതാവുന്നു എന്ന് തോന്നിയ ക്ഷണത്തിൽ തന്നെ പൊതു ജന സമ്പർക്കം പാർട്ടി നേരിട്ട് ഏറ്റെടുത്തില്ലേ?

ജനം എന്നാൽ എന്താണ്. പാർട്ടി തന്നെയല്ലേ. അതിൽ ഉൾക്കൊള്ളാത്തവർ ജനങ്ങളാവുന്നത് എങ്ങിനെ? അവരുടെ കാര്യങ്ങളോ അഭിപ്രായങ്ങളോ ഞങ്ങൾ എന്തിന്ന് ശ്രദ്ധിക്കണം? കേരളത്തിലെ ജനസംഖ്യ എന്നാൽ ഞങ്ങൾക്ക് പാർട്ടി കാർഡ് ഉള്ള പത്തു പന്ത്രണ്ട് ലക്ഷം ആളുകളാണ്. അവരുടെ ക്ഷേമല്ലേ ഞങ്ങൾ നോക്കേണ്ടത്. ദുരിത സമയത്ത് അവർ ഇത്തിരി ആശ്വാസം വീതിച്ചെടുത്തതിന്ന് എന്തൊരു ബഹളമായിരുന്നു.

അമേരിക്കയിലെ കുത്തക മാധ്യമങ്ങളും നാട്ടിലെ പാർട്ടി വിരുദ്ധരും കൂടി പാർട്ടിയെ തകർക്കാൻ ഒരു ശ്രമം നടത്തി എന്നത് സത്യമാണ്. വിജയങ്ങൾ മുഴുവൻ ഒരാൾക്ക് ചാർത്തികൊടുത്ത് പാർട്ടിയിൽ മറ്റൊരു ദൈവത്തെ വളർത്തികൊണ്ടുവരാനുള്ള ശ്രമങ്ങൾ ഞങ്ങൾ തിരിച്ചറിഞ്ഞു.

ഞങ്ങൾ എന്നും ഏകദൈവ വിശ്വാസികളാണ്. ആ ദൈവത്തെ ചിലപ്പോ ഞങ്ങൾ സഖാവ് എന്ന് വിളിക്കും. ചിലപ്പോ മറ്റെന്തെങ്കിലും. അതിന്ന് നിങ്ങൾക്കെന്താ?

മറ്റൊരു ദൈവത്തെയും ഞങ്ങൾ പൊറുപ്പിക്കില്ല. അത് ഇപ്പൊ കണ്ണൂർ ആയാലും, ആലപ്പുഴയായാലും. പുരയ്ക്ക് മീതെ വളരാൻ ശ്രമിച്ച ഒരു മരം ഇപ്പോഴും ഞങ്ങളുടെ അട്ടത്തുണ്ട്. മറിച്ച് വിശ്വസിക്കുന്നത് ചരിത്രം അറിയാത്തവർ. ഈ പരിപാടി ഞങ്ങൾ തുടങ്ങിയത് ഇന്നോ ഇന്നലെയോ അല്ല.

പിന്നെ ഏറ്റവും വലിയ ഭൂരിപക്ഷത്തിന്റെ കാര്യം. അതിൽ ഞങ്ങൾക്ക് യാതൊരു പങ്കുമില്ല എന്നതാണ് പരമാർത്ഥം. പിന്നെ എന്തിന്ന് ഞങ്ങൾ അത് മുഖവിലയ്‌ക്കെടുക്കണം.

കാര്യങ്ങൾ ഇങ്ങനെയാണെന്നിരിക്കെ ഈ ബഹളമൊക്കെ എന്തിനാണ്? പണ്ടത്തെ ഒരു മുദ്രാവാക്യം പൊടിതട്ടി പരിഷ്കരിച്ച് വീണ്ടും ഇതാ ഞങ്ങൾ ചോദിക്കുന്നു: ഞങ്ങടെ മന്ത്രിയെ ഞങ്ങള് തള്ളിയാ നിങ്ങക്കെന്താ മാളോരേ?